TAWAG-PAGPASA PARA SA BAGONG DAGTA: AKLAT NG EROTIKA!!!

Sa panahon ng kainitan ng diskusyon sa karapatan ng tao sa kanyang katawan at sa katawan ng kanyang kabiyak, ng mga maaari at di-maaaring gawin sa mga ari ng isa’t isa, sa kung ano ang banal at kung ano ang bastos at kung alin sa dalawa ang bibigyan ng suporta (at kung paano sila maaaring ipakita sa malikhaing akda), nais namin kayong imbitahan na magpasa ng inyong akdang-erotiko sa ikalawang inkarnasyon ng antolohiyang DAGTA, ang DAGTA DOS: HABOL-HININGA.

Tulad po ng sinasabi ng mga eksperto, ang pag-ulos ay me ritmo, at mula sa ritmo ay ang kabuuang hinahanap, kaya sa ngalan ng ritmo, kabuuan, at ng samu’t-sari nating restriksyon sa pakikipagniig, nais po naming bigyan ng ilang kundisyones ang mga akdang ipapasa para sa antolohiyang ito: ang hinahanap po namin ay mga akdang hindi bababa sa katorse at hindi lalampas sa sisenta’y-nuwebeng salita; ang hinahanap po namin ay mga akdang kinatha mula sa dilang Pilipino (puwera Inggles); ang hinahanap po namin ay mga akdang bakla, lesbiyana, macho, malandi, matalinhaga (at hindi), kuwento at sanaysay at tula at dula (at kahit ano pang mahahanap sa gitna); ang hinahanap po namin ay mga akdang hindi kontento sa isang pasadahan lamang; ang hinahanap po namin ay mga akdang pipilahan, babalik-balikan, hindi malilimutan.

Ipasa po ang mga akda sa dagatdagatangdagta(at)gmail(dot)com, sa format na RTF, bago ang ika-10 ng Oktubre, 2011, naka-address po sa aming dalawa, mga patnugot ng antolohiyang ito, sina Juan Poque Calvo at Giovanni “Gemini” Salud, sa pamumuno ni J. Luis Camacho. DAGTA DOS: HABOL-HININGA – pagod o euphoria?

Salamat po at panoorin/pakinggan na muli ang mahabang de-bate.